Massimu Susini

‘Ssu màrcuri 30 di marzu 11, hè statu  chjamatu à cumpariscia à u TGI di Bastia

‘Ssu màrcuri 30 di marzu 11, hè statu  chjamatu à cumpariscia à u TGI di Bastia, Massimu Susini militanti di a nostra urganizazioni pulìtica SCELTA PARA, avendu ricusatu di lascià piglià u so ADN.Tinimu à cumunicà u nostru parè inquant’è urganizazioni patriòtica è rivoluzionaria.

A vulintà sistemàtica di « fichage » di i militanti patriòtichi rivela una volta di più u caràttaru autoritariu d’unu Statu  imperialistu, dutatu d’un guvernu chì raprisenteghja l’intaressi soli di u capitali.

Fendu legi da nurmalizà l’inaccettèuli, issa riminiscenza di l’èpica quandu u còdici neru in vigori ind’è l’ìsuli detti « francesi », legalizava u « fichage » di  u corpu di i schiavi pigliendu a machja pa’ vìa di a so brama di libartà, rivela a listessa vulintà d’assigurà oghji in u quatru di a legi burghesi, i so predazioni riazziunarii. Lighjitimeghja una sucità di cuntrollu suciali è di a sottumissioni contr’à i strati suciali «  periculosi » pa’ ella ( i senza impieghi, pricarii, immigrati, sindicalisti, militanti rivoluzionarii, ecc.) insottumessi à u so taglioni.

‘Ssu accanimentu da impona un trattamentu penali à i quistioni d’òrdini pulìticu, riveni in rialità a sottintenda  ch’ellu ùn ci hè prublemu pulìticu, ma cà banditi in nomi pròprii. ‘Ssu pustulatu illustreghja chjaramenti l’andatura d’unu Statu viulenti ed a so vulintà di sdrughja tutti quelli chì fàcenu òpara cumuna di a so azzioni pulìtica quant’è  rivoluziunari di a lotta di liberazioni naziunali è suciali di u nostru paesi.

‘Ssa attitùdina liberticidia  fundata nant’à una strategìa di a tensioni, sprissioni di rapporti di  puteri, s’articuleghja intorn’à dui ughjettivi: l’unu d’identificà è cuntena i classi pupularii cum’è i militanti rivoluzionarii; l’altru d’assicurà a crèscita, a prusperità è u prufittu di l’indùstria di a punizioni intorn’à  u suchjosu settori di a biometrìa.

Agressori di l’intaressi pupularii è di l’aspirazioni patriòtica è rivoluzionarii di Corsica, u guvernu  francesu, trasgredisci ogni ghjornu di più i valori umanisti è altri facci finti ch’ella adopra à u nivellu intarnaziunali; cum’è a so fìsica nova di lupa chì nutrisci  i dimocrazii in traccia di nascia mentri si sustinava pocu fà i righjimi dittatorii.

A nostr’azzioni pa’ a liberazioni naziunali è suciali di u nostru paesi, pa’ una Corsica lìbara, degna, ugualitaria è sbarrazzati di a sfruttazioni capitalista, rinforza a nostra vulintà di metta in anda una lotta emancipatrici da u cambiamentu radicali di ‘ssa sucità di u soldu.

Chjamemu u nostru pòpulu à l’insumissioni naziunali ed à a ricusa massiva, sistemàtica, di tutta misura ripressiva

 

Quantu a cuscenza si sceta s’alza a risistenza …